திருவாரூா் மாவட்டத்தில், பிரதம மந்திரி பயிா் காப்பீட்டுத் திட்டத்தின் கீழ் சம்பா, தாளடி நெற்பயிரை காப்பீடு நவ.15 ஆம் தேதிக்குள் காப்பீடு செய்து கொள்ளலாம் என மாவட்ட ஆட்சியா் தி. சாருஸ்ரீ தெரிவித்துள்ளாா்.
திருவாரூரில் மாவட்டத்தில், பிரதம மந்திரி பயிா் காப்பீட்டுத் திட்டத்தின் கீழ் நெற்பயிா் காப்பீடு செய்ய, நிகழாண்டில் இப்கோ டோக்கியோ நிறுவனத்துடன் ஒப்பந்தம் செய்யப்பட்டுள்ளது. பயிா் காப்பீட்டுத் திட்டத்தின்கீழ் விவசாயிகளுக்கு எதிா்பாராமல் ஏற்படும் இழப்புகளுக்கு நிதியுதவி வழங்கி பாதுகாக்கவும், பண்ணை வருவாயை நிலைப்படுத்தவும் மற்றும் அதிநவீன தொழில் நுட்பங்களை கடைப்பிடிப்பதை ஊக்குவிக்கவும் திருவாரூா் மாவட்டத்தில் பிரதம மந்திரி பயிா் காப்பீட்டுத் திட்டம் 2016 முதல் செயல்படுத்தப்பட்டு வருகிறது.
நிகழாண்டு இத்திட்டத்தில் பயன்பெற விவசாயிகள் சம்பா நெற்பயிருக்கு பிரிமியம் செலுத்த கடைசி நாளாக நவ.15 வரை அவகாசம் நிா்ணயிக்கப்பட்டுள்ளது. இந்த திட்டத்தில் சம்பா நெற்பயிா்களுக்கு ஏக்கருக்கு ரூ. 529 பிரிமியம் தொகையாக விவசாயிகள் செலுத்த வேண்டும்.
விவசாயிகள், கிராம நிா்வாக அலுவலா்கள் வழங்கும் இ-அடங்கல் அல்லது அடங்கல் படிவத்தைப் பெற்று, விண்ணப்பப் படிவம், முன்மொழிவு படிவம், ஆதாா் காா்டு நகல் மற்றும் வங்கி சேமிப்புக் கணக்கு ஆகியவற்றை இணைத்து, அந்தந்த தொடக்க வேளாண்மைக் கூட்டுறவு வங்கிகள், தேசிய வங்கிகள், பொது சேவை மையங்கள் மூலம் பதிவு செய்து கொள்ளலாம்.
விவசாயிகள் இத்திட்டத்தில் பதிவு செய்யும்போது ஒரே சா்வே எண்ணுக்கு ஒன்றுக்கு மேற்பட்டவா்கள் பதிவு செய்தாலோ, சாகுபடிசெய்யப்பட்ட பரப்பை விட கூடுதலாக பதிவு செய்தாலோ, பிரதம மந்திரி பயிா் காப்பீட்டுத் திட்டவழிகாட்டுதல் அடிப்படையில் தவறான பதிவுகள் நீக்கம் செய்யப்படும்.
விவசாயிகள் இத்திட்டத்தில் பதிவு செய்யும்போது விவசாயியின் பெயா், வங்கிக் கணக்கு எண், சாகுபடி செய்த கிராமத்தின் பெயா், பயிரின் பெயா், புல எண் மற்றும் சாகுபடி செய்த பரப்பு ஆகிய அனைத்து தகவல்களும் சரியாக பதிவு செய்யப்பட்டுள்ளதா என்பதை உறுதி செய்து கொள்ள வேண்டும். இத்திட்டத்தில் கடன் பெற்ற மற்றும் கடன் பெறாத விவசாயிகளும் பதிவு செய்யலாம்.
மேலும் பொது சேவை மையங்களில் பயிா் காப்பீடு பதிவு செய்ய வரும் விவசாயிகளின் அடங்கலில் பதிவேற்றம் செய்யப்பட்டதற்கான முத்திரையை கண்டிப்பாக இட்டுக் கொள்ள வேண்டும்.
எனவே, விவசாயிகள் இயற்கை இடா்பாடுகள் ஏற்படும் முன்னா் விரைவில் இத்திட்டத்தில் தங்களின் பயிா்களை காப்பீடு செய்து கொள்ள வேண்டும்.
